Хрестоматия по истории

ГРАМОТЫ ЦАРЯ ИЗ АЛЕКСАНДРОВОЙ СЛОБОДЫ  

А генваря в 3 день прислал царь и великий князь из Слободы ко отцу своему и богомолцу к Офонасию, митрополиту всеа Русии, с Констянтином Дмитреевым сыном Поливанова с товарыщи, да список, а в нем писаны измены боярские и воеводские и всяких приказных людей, которые они змены делали и убытки государству его, до его государьского возрасту.

После отца его, блаженные памяти великого государя царя и великого князя Василия Ивановича всеа Русии; и царь и великий князь гнев свой положил на своих богомолцев на архиепископов, и епископов, и на архимандритов, и на игуменов, и на бояр своих и на дворецкого и конюшего, и на околничих, и на казначеев, и на дьяков, и на детей боярских, и на всех приказных людей, опалу свою положил в том: что после отца его блаженные памяти великого государя Василия, при его государстве, в его государьские несвершенные лета, бояре и все приказные люди его государства людем многие убытки делали и казны его государьские тощили, а прибытков   его казне государьской никоторой не прибавливали.

Также бояре его и воеводы земли его государские себе розоимали и другом своим, племяни его, государьские земли роздавали, и держачи за собою бояре и воеводы поместья и вотчины великия, и жалования государьския кормленые емлючи 2, и собрав себе великие богатства, и о государе и о его государьстве и о всем православном християнстве не хотя радети, и от недругов его от Крымского и от Литовскаго и от Немец не хотя крестиянства обороняти, наипаче же крестияном насилие чинити, и сами от службы учали удалятися, и за православных крестиян кровопролитие против безсермен и против латын и немец стояти не похотели; и в чем он государь бояр своих и всех приказных людей, также и служилых князей и детей боярских похочет которых в их винах понаказати и посмотрити, и архиепископы и епископы и архимандриты и игумены, сложась с бояры и с дворяны и с дьяки и со всеми приказными людми, почали по них же государю царю и великому князю покрывати.

 И царь и государь великий князь, от великие жалости сердца, не хотя их многих изменных дел терпети, оставил свое государьство и поехал, где вселитися, идеже его государя бог наставит.

К гостем же и к купцом и ко всему православному крестианству града Москвы царь и великий князь прислал грамоту с Костянтином Поливановым, а велел перед гостьми и перед всеми людми ту грамоту прочести дьяком Путилу Михайлову да Ондрею Васильеву; а в грамоте своей к ним писал, чтобы они себе никоторого сумнения не держали, гневу на них и опалы никоторые нет.